Wuběr rěčow:

Sportowa jednotka Njebjelčicy z.t.

Krótkopředstajenje

adresa

Při skali 4
01920 Njebjelčicy

załožene

1957

čisło w towarstwowym zapisku

 VR 8092

prezident

Bjarnat Deleńk

zastupjer

Marcel Hanski,
Handrij Krawčik

pokładnik

Korla-Hinc Libš

čłonojo

136

Stawizny Sportoweje jednotki

Sportowa jednotka Njebjelčicy so w lěće 1957 załoži.
Jeje 1. předsyda bě knjez Franc Bjarnatka. 1983 wolichu Křesćana Ričla za předsydu towarstwa a wot 1990 bě wón prezident Sportoweje jednotki Njebjelčicy z.t.
Dokelž njebě w Njebjelčicach do lěta 1957 hrajnišća, jězdźachu hrajerjo kaž Franc Bjarnatka, Jan Hejduška, Pětr Šołta a Cyril Krawčik do Hlinowca na kopańcu. Skónčnje wobzamknychu koparjo Franc Bjarnatka, Gerat Libš, Jan Libš a Jurij Wićaz z podpěru tehdyšeho wjesnjanosty Zahona sportowe towarstwo załožić. To sta so potajkim runje před 50 lětami, 8. nowembra 1957.

Wot 1957 do 1960 přewjedźe SJ Njebjelčicy 108 hrow. Zwjetša kopachu do bula na twjerdym hrajnišću we Hlinowcu, dokelž přeco hišće sportnišćo doma njemějachu. Hakle 1960 počachu mokru Žurec/Koklic łuku při puću na směr Jěžow nawožować, zo by mohło nowe sportnišćo nastać. Prěnja přećelska hra Njebjelčanow na tutym hrajnišću 20.08.1960 skónči so z 1:6 za Hlinowc. Kapitan mustwa bě Gerat Libš.
1964 poradźi so SJ Njebjelčicam postup do wokrjesneje klasy. Wulke zasłužby na tutym wuspěchu ma wjednik sekcije Manfred Zickmüller.
1968 nawjazachu Njebjelčenjo partnerske styki ze Sportowej jednotku  Roztoky (wokrjes Semily/Čěska).
Wot 1970 do 1993 dźěłaše Křesćan Ričel předewšěm z sportowym dorostom w Njebjelčicach jara aktiwnje.
1972 wotzamkny so partnerske zrěčenje ze Sportowej jednotku Rynoltice "Stara Garda" Čěska).
1983 nasta wjacezaměrowa rumnosć z 50 městnami, kotraž hodźeše so za zhromadźizny, zetkawanja abo tež swójbne swjedźenje derje wužiwać.
1987/1988 dobychu Njebjelčenjo wokrjesne mištrstwo kopańcy.
1989 postupi 1. mustwo muži do wobwodneje klasy.
Kónc měrca 1998 wotewrě so po wobšěrnym ponowjenju sportowy hosćeńc znowa. Z toho časa wužiwa so rumnosć wot sportowcow runje tak kaž wot swójbow abo gmejny za wšelake zarjadowanja. Na delni poschod sportoweho domu - tam su rumnosće za předrasćenje, přebywanje, nuzniki, dušowarnje a hosćeńc - so poschod natwari. W nim ma dźensa gmejna swoje sydło, je kniharnja zaměstnjena a w zadnim dźělu so přeco znowa wustajeńcy natwarjeja.
W septembru 1999 wuzwoli so nowe předsydstwo a nowe wustawki so wobzamknychu. Z toho časa je Bjarnat Deleńk prezident, jeho zastupjerjej staj Marcel Hanski a Tomaš Čornak. Pokładnik je dale Korla-Hinc Libš.
Dnja 16.09.2005 zamrě po ćežkej chorosći naš dołholětny předsyda a čestny prezident Křesćan Ričel. Wón bě wjele lět spušćomny sobudźěłaćer gmejny a skutkowaše přeco na dobro gmejny a sportoweje jednotki.
Wurjadne dožiwjenje mějachu 700 lubowarjow kopańcy 18. meje 2006 na rjanym trawniku w Njebjelčicach. Wrotar  1. FC Dynamo Drježdźany Ignjac Kresic steješe na prěnim wurisanju "Najlěpši serbski třělc jědnatkow" we wrotach. Potym móžachu wopytowarjo z nim pobjesadować abo sej po awtogram dóńć.
W awgusće lěta 2006 wróći so po 19 lětach Frank Ričel - naposledk hrajer pola wyšeho ligista Budissa Budyšin - zaso do ródnych Njebjelčic. Wón so nadźija, zo móže ze swojimi nazhonjenjemi hrajerjow SJ podpěrać.
Wot awgusta 2006 ma SJ Njebjelčicy Bambini-skupinu. Pjerachow nawjedujetaj Frank Ričel a Frank Domš.

sobustawojo SJ Njebjelčicy, staw: 2006 - 146

Impressum und Datenschutz | Impresum a šškit datow
Partnerojo: http://www.heldhaus.de | http://www.am-klosterwasser.de | http://www.krabatregion.de