Wuběr rěčow:

Fara w Njebjelčicach

Katolska fara "Swjateho Měrćina"

Hłowna dróha 27
01920 Njebjelčicy

telefon: 03578 302005
faks: 03578/308866

farar

Michał Nawka

dale tež pod > http://www.tcm-kp.de

Štóž chce wjace wo Swjatym Měrćinje wědźeć, njech pohlada na stronu www.martin-von-tours.de

Wosadna cyrkej "Swjateho Měrćina"

Wot starodawna steješe wosrjedź wsy - na něhdyšim kěrchowje - drjewjana kapałka, swj. Měrćinej poswjećena. Bože słužby zastarachu mniša z klóštra  we Kamjencu a to něhdźe hač do lěta 1500.  W lěće 1739 wotpali so drjewjana kapałka.

Nětko bu wot lěta 1740 do 1743 nowa cyrkej natwarjena. Wona je po swojim stilu drje jedna  z najrjeńšich cyrkwjow daloko a šěroko. Stoji wysoko postajena na skale a hlada majestotnje do wsy dele. Cyrkej je wysoki twar, nutřka na 18 m wysoki. Cyrkej bu  1907 wot wušikneho mištra Hinrichsa z Lipska krasnje wumolowana. Rjane serbske wobrazy debjachu sćěny, zo bychu pozdźišim splaham swědčiłe, wo serbskim žiwjenju. Tež wšitke druhe wobrazy a symbole maja swoju wažnosć a debja a pyša krasnu swjatnicu. Tak  běše tu cyły katechismus a swj. pismo na sćěnach. Wumolowanja stachu so po předpismach knjeza fararja Kubaša.

Rjany a wuměłski je tež wulki wołtar. Wón je 16 m wysoki, korintiske stołpy a pilastry jón debja a na stronach stejitej postawje swj. Marhaty a Katyrny. Wyše wulkeho swjećeća, kotrež swj. Marijine donjebjesspěćo předstaja, je swjećo swj. Měrćina, ze stareje cyrkwje hišće zdźeržane. Na nowym wołtarju swj. Marije je rjane wołtarne swjećo swj. Měrćina. Tute je kralowska princesna Mathilda molowała a cyrkwi dariła.

1912 dósta cyrkej  nowe pišćele a 1923 tři nowe zwony. Dokelž so w druhej swětowej wójnje wšě tři zwony zebrachu, dósta cyrkej w lěće 1964 štyri nowe zwony z Apoldy.

Do wosady słušeštej zwotprědka jenož Njebjelčicy a Serbske Pazlicy. 1765 buchu Pěskecy do Njebjelčic zafarowane.

1993 so wosadna katolska cyrkej wonkownje dospołnje wobnowi. Stara třěcha so zwottorha, zo bychu přez Gerntkec třěchikryjarsku firmu ze Smječkec so móhli nowe cyhele připrawić.

Cyłe lěto 1993 so cyrkej tež wotnutřka wobnowi. Molerjo su jara pilnje dźěłali. Wjerch a sćěny dyrbjachu so pjeć razow z ruku bělić. Za to wužiwachu  jenož běłe wapno bjez kóždeho dalšeho přidawka.  Dospołnje wobnowi so tohorunja barokowy wołtar. Poslednje wobnowjenje sta so před 20 lětami. Tójšto dźěła maja hišće elektrikarjo. Za porjadne elektriske dźěła rukuje tu Špitankec firma ze Zejic. Wša elektriska instalacija bu wobnowjena. Wšě powody dyrbja so nětko hišće w kašćikach zwjazać. Drjewjane schody na chór so tohorunja wobnowja. Cyrkej nutřka budźe potom dospołnje ponowjena.

Tež wěža wot nutřka je dospołnje hotowa. Stary wobmjetk bu wotstronjeny a nowy připrawjeny.

Impressum und Datenschutz | Impresum a šškit datow
Partnerojo: http://www.heldhaus.de | http://www.am-klosterwasser.de | http://www.krabatregion.de