Wuběr rěčow:

1. mjezynarodna rězbarska dźěłarnička 2006

Rozprawa

Loni (2006) wobdźěli so na dwanaćednjowskej dźěłarničce 20 rězbarjow z Pólskeje, Čěskeje a Němskeje. Zapodali běchu skicy a modele jako namjet swojich wotpohladanych dźěłow. Tute so zwjetša wot organizatorow jako dobre přiwzachu.  Na prěnim dnju  wuzwoli sej kóždy swoje městno při Miłočanskej skali,  swój kamjen abo  zdónk, kotryž chcyše wobdźěłać. Škitne stany so nastajichu. "Najwjetši" problem bě transport pjeć tonow ćežkeho topoła z Kamjenca. Ale bjez tuteho njeby so "Njebjelčanka" ze zdónka wudypać móhła. Rězbarjo bydlachu we Wěteńcy pola Bjedrichec a chwalachu sej dobre zastaranje z jědźu. Dwaj přednoškaj wo serbskich bajowych postawach a k stawiznam Miłočanskeje skale kaž tež wopyt skały w  Bischheim - Häslich skulojćichu přebywanje wuměłcow.  Kóždy dźeń  přiběraše ličba wćipnych  wopytowarjow  na dźěłowym městnje pilnych "dypornakow", běchu tam šulske rjadownje, něhdyši skałarjo, turisća a wobydlerjo wokolnych wsow. Wězo bě zajim nowinarjow a rozhłósownikow kaž tež telewiznych sćelakow wotpowědnje wulki. Zakónčenje bě 15. septembra, hdyž so wšitke dźěła zjawnosći pokazachu. Serbski ludowy ansambl z Budyšina zawjeseli přichwatacych 350 hosći z čerstwym programom. Wo ćělne derjeměće starachu so sobudźěłaćerjo twarskeho dwora runje tak kaž Njebjelčanske domizniske towarstwo. Za čas dźěłarnički nasta  8 skulpturow ze zornowca,  7 reliefow/skulpturow z pěskowca a 8 drjewjanych plastikow. W samsnym času nastaji so blisko skały wulka metalowa plastika z mjenom "Geschweißte Ortnung" wot profesora Sitte. Tutu bě gmejna w Kinsporku kupiła a tamniši wučobnicy pod nawodom mištra Findeisena  ju na nowym městnje zaso natwarichu.
W oktobrje wuhódnoći gmejna a přeprošeni wuměłcy dźěłarničku. A dokelž bě tak wuspěšna, wobzamknychu 2007 znowa jednu přewjesć a maja hižo myslički, kak móhli z pomocu towarstwa nurjakow w Miłočanskej skale skulptury pod wodu natwarić....  
Było by to wot 28.08. - 9.09.07, jeli so spěchowanje přez Euroregionu Nisa přizwoli.

Dalše informacije

  • separatnje nastajena prezentacija; wočini so w nowym woknješku dale >
Impressum und Datenschutz | Impresum a šškit datow
Partnerojo: http://www.heldhaus.de | http://www.am-klosterwasser.de | http://www.krabatregion.de