| wobydlerjo (staw 31.12.2022) | 227 |
| wjesny dźěl gmejny Njebjelčicy | 01.01.1994 |
Wokoło ryćerkubła Pěskecy rjaduja so rjane domy a burske statoki. Jako "hród" mjenowane ryćerkubło so najskerje na městnje wodoweho hrodu natwari. Dźensa słuži jako bydlenski dom. Někotre metry dale namakaš Bulankec jěchanski dwór a wot wjesnjanjow natwarjenu kapałku.
Pěskecy leža wosrjedź lěsow a na pěskowych zahonach. Na pěsk pokaza tež mjeno wjeski, kiž so 1280 jako Pezkowicz naspomni. We wokolnych lěsach rostu wšelake rostliny a kerki, kaž na přikład jałorc. Na puću do Róžanta namakaš rjanu a sylnu lipu. Mjez Pěskecami a Smjerdźacej pokazuja 17 škitane hórske rowy (mohily) na něhdyšu Łužisku kulturu.
Wot 1947 do 1959 bě južnje Pěskec brunicowa jama wotkryta. Nětko je "Manfredsee" (w ludźe dale "jama" mjenowany) z wodu napjelnjeny a poskićuje wodosportowcam domiznu.
Wobydlerjo Pěskec wobsedźa rjane přirodne sportnišćo. Wone so zhromadnje ze sportowym domom wot Sportoweho towarstwa wobhospodari. Při sportnišću je tež młodźinski klub. Nimo toho maja Pěskecy wjesnu wohnjowu woboru.
Žórła: Hans Neumann a Werner Schmidt, "Westliche Oberlausitz zwischen Kamenz und Königswartha", 1990; Heinz Kubasch, "Heimatbuch"
dalše informacije [⇒]
